星期天的親子對話。
貓爸:運動場剛翻新好,傍晚和小貓去跑步。
小貓:個天灰到爆,仲去跑?
貓爸:近來空氣真的很污濁,你猜和亞馬遜森林大火有沒有關係呢?
小貓:亞馬遜在南美洲,十萬八千里咁遠!
貓爸:小貓知不知這場火災,全球都受到威脅?
小貓:又想討論時事常識?
貓爸:考考小貓,知不知論面積,亞馬遜森林在全球熱帶雨林中排名第幾?
小貓:第一嘛!它還有個外號叫「地球之肺」。
貓爸:有睇新聞噃!其實當地每年七至九月都是旱季,經常有山火,但今場大火火頭多,規模又大,而且不斷蔓延,目前還未能確定影響有多嚴重,不過直至八月尾,大火造成的碳排放量已有228兆噸。另外,地球上10至20%的氧氣都由這個雨林提供。
小貓:真的麼?不過,若果香港的污染物真的由大火引致,似乎印尼山火威脅大好多!
貓爸:最近印尼又有山火?
小貓:爸B冇睇新聞咩?馬來西亞和新加坡都遭殃,天色灰蒙蒙。馬來西亞一班專業人士還建議政府,向國際法庭控告印尼政府。
貓爸:小貓有留意時事,叻叻!
小貓:有一樣可能連爸B都唔知。
貓爸:係乜?
小貓:有專家已經澄清,地表植物光合作用帶來的氧氣,的確有16%來自亞馬遜森林,之但係大部分都會吸收返,換句話說,貢獻其實並非很大。
貓爸:20%條數,係法國總統馬克龍講嘅,連佢都搞錯?