圖：陳細潔希望透過保留關帝誕祭祀儀式，傳承歷史傳統大公報記者徐曉彤攝

　　關公真係好忙！除咗坐鎮警署，有139年歷史嘅保良局，創局初期都已經有關公坐鎮，當年每逢審理拐帶案、處理立誓領育或領婚，都要喺關公像前進行，以示公正。領育被拐賣兒童嘅父母，也必須先向關公立誓，善待領養子女，唔可以當作奴婢；而因為家庭、婚姻糾紛出走嘅女童，成年後可由保良局安排適婚男子相睇，如果情投意合，就喺關公像前結婚。

　　保留祭祀關公誕傳承歷史

　　時至今日，領養服務改由社會福利署負責，領婚服務亦早喺上世紀七十年代取消，關公像前立誓嘅習俗不復存在，但保良局仍有供奉關公。關公誕（農曆六月廿四）已納入香港首份非物質文化遺產清單，為保存傳統習俗，保良局尋日就喺總部嘅關帝廳，舉行一年一度嘅關聖帝君寶誕祭祀典禮，儀式有約20人參加，包括保良局主席陳細潔、董事會成員、顧問局成員等。

　　關帝廳採清代建築設計，中央擺放關公畫像，上有「乾坤正氣」匾額，氣氛莊嚴。儀式備有三牲果品，眾人先行三鞠躬禮，降神禮、再由代表行初獻禮、亞獻禮、三獻禮，向關公獻上供品並敬酒，繼而焚束帛行望燎禮，即焚燒紙紮祭品，眾人再逐一在關公像前上香。陳細潔由於有宗教信仰，改由副主席馬清楠主祭。陳細潔話，保良局多年供奉關公，希望保祐該局「保赤安良」，維持至今仍保留每年舉行關公誕祭祀儀式，傳承歷史傳統。