圖：過百名壹傳媒員工發起工業行動，抗議壹傳媒黑箱外判\大公報記者黃洋港攝
「肥佬黎」黎智英旗下壹傳媒近日推行「假外判真裁員」縮數方案，令員工士氣大受打擊，過百名壹傳媒員工尋日首度發起工業行動，喺公司門外默站15分鐘，舉起「專業外判 人心散渙」、「黑箱搞外判 同事被背叛」、「唔係乜都可以外判畀人」等標語，要求公司立即撤回外判方案。
壹傳媒工會發言人林偉聰批評，外判係傳媒零散化嘅開始，是「壹傳媒作為良好僱主嘅終點」，大鬧公司不近人情，黑箱作業，現有約30至50名美術部員工受影響，擔心今日裁走美術部，他日輪到佢哋，前線員工更加未參與討論就被遣散。活動完結時，現場颳起狂風暴雨，正值風雨飄搖嘅壹傳媒，夠曬應景。
勞工及福利局局長羅致光話，現時始終係勞資商討過程，如果勞方有特別需要勞工處幫助，政府很樂意幫忙。
