圖：民建聯四大長老一齊飲茶吹水\ 民建聯fb 短片截圖
民建聯「四大長老」曾鈺成、譚耀宗、葉國謙、陳鑑林（橄欖），告別立法會議員生涯後，相對清閒，有咩新搞作呢？民建聯Facebook尋日上載短片，橄欖請咗三位「長老」一齊飲茶吹水。譚sir問橄欖，上次有冇嚟打麻雀，佢話無，曾主席就立即潤佢話，橄欖掛住搵錢唔得閒打牌，橄欖幽默回應：「賺錢支持民建聯」，又話「呢啲叫做發展經濟、共享繁榮」。無見一排，橄欖仍然咁生鬼。
「四大長老」跟住講到「一帶一路」。前特首梁振英喺施政報告多次提及「一帶一路」，希望香港人多啲把握機遇，曾主席、阿謙都話，其他國家一直好關心「一帶一路」嘅發展。曾主席話，自從梁振英講完之後，匈牙利政府立即邀請立法會議員去匈牙利訪問，仲問主席有關「一帶一路」嘅問題。阿謙都話，舊年去俄羅斯莫斯科，當地後生仔亦都好緊張「一帶一路」嘅發展。睇見香港反應冷淡，橄欖就建議，希望有一個平台可以畀企業同市民參與，加深大家嘅了解。鄭晴亦都有一個建議，後生仔咁鍾意去旅行，應該把握學校嘅考察團或交流機會，或者直接去「一帶一路」國家旅遊，多啲了解，咁樣先有發展機遇嘛。
