圖：游蕙禎接受外媒Getty Images拍攝的床照（大圖），與業主委託地產中介網上放盤相周遭環境一樣\Billy H.C.Kwok/Getty Images

　　游蕙禎七一鬼祟現身街頭，見港媒鏡頭即左閃右避走人，但對住外媒就不大一樣，畀外籍記者入佢租住嘅灣仔金樂大廈頂層單位做訪問，鄭晴發現，游蕙禎開門迎洋人入「香閨」前幾粒鐘，英國《衛報》已經上載咗一篇佢「唱衰」回歸嘅訪問。鍾意影相嘅游蕙禎，仲有張倚喺屋企床上擺pose摸貓嘅「床照」上載於Getty Images。

　　鄭晴目睹喺七一前兩日，6月29號下午五點半，有兩名外籍人士連同一名染金髮嘅華裔女子，帶曬攝錄機、相機，喺游蕙禎租住嘅灣仔金樂大廈門口，三個人傾咗一輪，然後向住大廈對講機，按游蕙禎租住嘅頂層單位，獲得批准後進入大廈。過咗一個鐘頭十分鐘，呢三名外媒離開，去太古城東隅酒店天台飲嘢吹水。

　　游蕙禎七一前馬不停蹄，不斷迎送「老外」。鄭晴查到當日入佢屋嘅兩名外籍人士，係駐香港嘅西班牙籍記者Zigor Aldama及Miguel Candela。而西班牙記者入游屋前幾粒鐘，英國《衛報》就上載一篇游蕙禎專訪，內容都係借題發揮，「唱衰香港」。

　　《衛報》記者有無好似西班牙記者入埋屋做訪問就不得而知，不過總部喺美國華盛頓嘅Getty Images，上載一幀游蕙禎嘅「床照」。唔好心邪，倚喺床上嘅游蕙禎穿背心，蓋住藍底白間條被鋪，好悠閒咁兩手摸住隻貓，低頭望住電腦嘅生活照。

　　對返游租住單位業主之前網上放盤嘅室內相片，呢張「床照」拍攝地點又係游嘅屋企，不過陪游喺張床上，係一隻小貓，而唔係上次被警方發現，「離奇」赤腳現身游屋天台嘅梁頌恆。

　　游蕙禎頻頻迎外媒嘅灣仔金樂大廈頂樓連天台「香閨」，月租二萬，游經常搭的士代步，之前游蕙禎唔係對住傳媒呻話搵唔到長工，連散工都無，要靠積蓄過活，佢份「老本」都好豐厚。