圖：首次舉辦嘅香港運動消閒博覽會有幾十件球星簽名波衫睇
夏日熱辣辣，想做嚇運動，但唔想同陽光玩遊戲？灣仔會展中心下個月起，將會有書展等大型活動陸續舉行，齋行已經考你腳骨力。咁都不特止，貿發局今年喺書展期間，仲首次舉辦香港運動消閒博覽，除咗多件球星簽名波衫畀球迷睇下之外，仲設置攀石牆、新興運動試玩等。室內出一身汗，話咁易啦。
持書展門票免費入場
呢個運動消閒博覽將會喺下月21至25日，一連五日喺灣仔會展中心大會堂舉行。博覽有六個展區，包括戶外體驗、運動營、健康與健身、攝影世界、樂遊天地，以及手工藝墟，夾埋有近百間參展商展出120個運動及消閒品牌。除此以外，香港攀石訓練學會設有攀石牆提供試玩，青協就有獨木舟機、地壺和花式跳繩挑戰，而足球概念店「Futbol Trend」就會展出三、四十件足球球星波衫，包括美斯、尼馬、基斯坦奴朗拿度，同埋啱啱訪港無耐嘅「大哨」朗拿度。
咁多嘢玩，點收費？定啲嚟！只需要手持價值25蚊嘅書展門票，就可以免費入場。一張飛，兩種體驗，值回票價啦！
