圖：睇相係咪分唔清呢？鄭晴教精你，係「偽九巴」

　　公共交通工具近期優惠多籮籮！港鐵啱啱推出八達通97折優惠後，九巴同香港電車尋日亦宣布破天荒合作，推出為期半年嘅特別轉乘優惠。七一起，凡嘟同一張八達通，搭指定九巴專營過海路線同電車，即時慳兩個三（小童就慳個二），即係慳咗一程電車錢。

　　呢次提供優惠嘅過海巴士路線總共有成24條（詳見表），主要由港島區往返上水、粉嶺、屯門、元朗西、荃灣等區。不過，想用優惠要注意喇，如果先搭九巴再轉電車，乘客一定要喺九巴「嘟」八達通後三個鐘頭內轉搭電車；倒轉頭先搭電車再轉九巴，就一定要一個鐘頭內轉乘，逾時就無優惠。

　　假日或設寵物線

　　為咗呢次優惠，兩間公司仲搞新意思，將一架電車同一架巴士嘅外表互換。大家喺電車軌上見到「巴士」行過，唔使驚訝，因為巴士只係佢嘅「偽裝」，佢嘅真身依然係部電車。鄭晴即時送上「偽巴士」同「偽電車」，你又分唔分得清呢？

　　九巴企業策劃及業務發展總經理蘇偉基尋日同鄭晴講，如果優惠計劃反應好，唔排除延長；至於九巴月票優惠，就仍喺研究當中。另外，九巴書面回覆立法會議員劉國勳查詢時話，對於有建議假日開設寵物巴士路線，九巴持開放態度，願意探討畀帶指定類別同大小嘅動物，喺合理看管情況下坐車。