圖：劉業強參觀杭州G20峰會會場不禁感嘆國家富強
鄉議局主席劉業強率團一連四日走訪浙江，佢哋尋日就去咗杭州G20峰會會場同烏鎮嘅國際互聯網峰會會場。G20會場總建築面積有85萬平方米，加上融合古代同現代嘅裝潢風格，一磚一瓦都非常講究，劉業強不禁感嘆國家富強，不但成功舉辦多場國際級會議，仲充分展現咗中華傳統文化。佢仲笑住咁話，新界鄉議局嘅二十七鄉都可以考慮搞返個27鄉峰會，順便食個「27鄉盆菜宴」，展現下新界獨有文化。
另外，鄉議局訪問團尋日又去咗著名嘅江南水鄉「烏鎮」考察，呢個傳統古鎮已經舉辦三次國際性「世界互聯網峰會」，成個鎮都有WiFi覆蓋，非常先進。劉業強話，烏鎮歷史悠久但依然保存得完好，更加入網絡令人民生活更方便，非常值得香港學習。鄭晴就覺得，香港雖然係國際城市，但好多新界地方依然無網絡或網速甚慢，特區政府真係要好好建設規劃鄉郊，實現智慧城市、城鄉共融啦。
