大公網訊 大家有幾耐無去過圖書館呢?又或者，大家鍾意去圖書館借咩書呢? 民政事務局書面回覆立法會議員提問，大家估下舊年成人中文非小說類書籍嘅頭十位係邊十書呢?
其實都好容易估啫，十本之中，有九本都是旅遊書，當中有七本都係日本，睇嚟香港人真係真係好鍾意去日本，似乎想去勻成個日本添。第十位就係《日本北海道：札幌、小樽，旭川，登別，洞爺湖》，借閱量高達8777次。至於第七位，就係《日本中部：名古屋 金沢 高山 白川鄉食玩買終極天書》，借閱量高達9692次。至於港人經常去嘅東京，《東京食玩買終極天書》排名第二位，借閱量有12859次。
其餘兩本唔係日本嘅旅遊書，一本就係關於首爾及濟州，排名第八，另一本就係新加坡，排名第五。好啦！到底第一位係咪都係旅遊書呢? 係咪都係日本呢?恐怕大家要失望啦！因為第一位就係《香港中學文憑考試.中國語文》，借閱量有12933次。莘莘學子都好關心自己考試呢！至於成人英文非小說類書籍排名，第一位都係文憑試卷題目，英文科試題嘅借閱量仲勁過中文科，達14342次，其他都係關於高考英語運用同埋香港稅制。
