大公產品

首頁 > 港聞 > 正文

40蚊飛加推二萬張 1.16親身去海園撲

時間:2017-01-12 03:15:20來源:大公網

  圖:海洋公園40蚊飛新優惠日期延長五日至本月廿七日

  「去玩!去癲!嚟Ocean Park!」海洋公園為咗慶祝開業40周年,尋日推出港人專享嘅40蚊門票優惠,立即掀起全城瘋搶,大批市民失望而回。好彩,海洋公園馬上宣布加推優惠五日,總共推出48000張優惠飛,可以玩到年三十晚。尋日買唔到飛嘅朋友,終於可以講句:「這些機會是屬於我的!」

  三萬人搶飛搞到hang機

  海洋公園前日宣布推出28000張40蚊優惠飛,反應極度熱烈,搞到海洋公園官網尋日四點開售即刻網絡大塞車,最高峰時有超過三萬人同時登入搶飛,搞到有網民「嬲嬲豬」,留言鬧爆。海園話,發現有人出蠱惑,唔依照正常程序登入公園網上系統買飛。而為咗答謝市民支持,所以決定加推20000張特惠飛,即是合共48000張。

  新優惠日期由原先嘅1月16至22日,延長五日至27日,趁農曆年三十晚前喺公園睇嚇馬騮,送舊迎新。

  不過,港人要注意,今次買飛換咗新玩法!大家唔可以再喺電腦面前坐定定,反而要熱嚇身,當日親到海洋公園票務部,出示香港身份證明文件,先可以買到40蚊優惠飛,每人限買四張,每日名額4000個。即場買唔到40蚊飛既香港市民,就可以用八折買飛,同樣限買四張。至於尋日喺網站買到飛嘅市民,就繼續持票入場。

最新要聞

最新要聞

最受歡迎