圖：傳張秀賢會參加新東立會補選 　　　　資料圖片

　　因為宣誓風波而被取消立法會議員資格嘅青年新政梁頌恆同游蕙禎，佢哋分別響新界東同九龍西嘅議席已經被政府宣布懸空。雖然仲未知幾時會補選，但係反對派內部已經有唔少人對呢兩個議席虎視眈眈。有消息指，連「本土派」都計劃派人參選，人選有可能係中大學生會前會長、學聯前常委張秀賢。

　　早前諗住參選選舉委員會高等教育界選委嘅張秀賢，因為不被選舉主任信納佢同界別有密切聯繫而被取消資格，點知轉個頭就傳出有意玩立法會補選「爭櫈仔」。有消息話，如果張秀賢真係參選，唔會行「港獨」路線，而係行親「泛民」嘅溫和路線，向反對派和「本土派」支持者「吸票」。睇來佢都知而家「港獨」係選舉「票房毒藥」，但咁樣行出來代表「本土派」又好似自欺欺人咁囉。

　　除咗張秀賢，前民主黨成員鄭家富同埋連任失敗嘅新民主同盟范國威（「咖喱飯」）都話會考慮參加補選。不過，未開戰先有火藥味，「咖喱飯」尋日接受傳媒訪問時就再第N次指佢立會敗選是遭鄭家富「鎅票」哦，佢更指鄭家富建議為補選進行初選旨在「洗底」。

　　另一邊廂，響九龍西已經有一席嘅民主黨，似乎想藉補選搶多一席。其中，民主黨司庫袁海文一早就話想參加補選。佢接受媒體訪問時就話，希望能夠代表民主黨參與反對派初選。不過，據聞民主黨內部有聲音話，嚟緊嘅補選應該讓俾早前立法會選舉失利嘅反對派細政黨參選。反對派嘅補選爭位戰都有排打，鄭晴已經買定好多花生了。