陳克勤獲贈心型有機肥料
大公網12月19日訊 （記者 李淇）又到聖誕！嚟緊星期日就係聖誕節啦，唔知大家諗好送咩禮物未呢？民建聯立法會議員陳克勤就已經提早收到份咖啡色心心型既「聖誕大禮」，仲「寫包單」你唔會估到係咩。正當大家以為佢係心型牛扒咁浪漫之際，克勤竟然斬釘截鐵咁話「錯！它是一劈牛屎」，仲要係純天然絕無異味無人造色素添加嗰隻。
送「屎」做聖誕禮物咁大整估？大家千祈唔好以為有人「惡搞」，克勤自己就相當歡喜這餅牛屎啵。佢話，份禮係團體「西貢護牛天使」親手製作的，因為自從本地牛退役不再耕作後，西貢有好多流浪牛牛，好多司機成日都不小心撞到佢哋，令牛牛受傷之後又唔理，所以不時都會幫「護牛天使」聯絡漁護署，探討流浪牛隻問題，所以團體送上呢劈牛BB糞便答謝佢。
克勤話，真係咁大個仔第一次聖誕禮物收「糞便」，但十分之有意義。既然牛牛轉行為盤裁提供最天然的肥料，克勤亦都將心心分開咗一半，分別係立法會同屋企種花，仲笑住話：「其實插在牛糞上既先係最靚既鮮花。」咁別出心裁，睇來聖誕送水杯同鎖匙例牌野，真係過哂氣啦，環保才是王道！
