記者和議員大合照。大公報記者林良堅/攝

　　大公網7月5日訊（記者許嘉信）四年一屆嘅立法會嚟到尾聲，立法會秘書處一如以往同傳媒代表合作，舉辦同樂日，20多位立法會議員暫且放下公事，尋晚同幾十位記者響立法會宴會廳歡聚一堂，又唱歌又玩遊戲，不亦樂乎。立法會主席曾鈺成、內會主席梁君彥、立法會秘書處陳維安都有抽空出席，其中曾出席仲大開金口，同黨友蔣麗芸（Ann姐）高歌一曲《獅子山下》，一向「好吹得」嘅經民聯盧偉國（Dr.Lo）仲帶埋自己支色士風出嚟，為兩位議員伴奏，鄭晴同成班行家都聽出耳油丫！

曾鈺成和蔣麗芸表演合唱。大公報記者林良堅/攝

　　曾主席最近好鍾意響報章專欄撰文，叫讀者猜嚇謎、玩嚇文字遊戲，表達一啲弦外之音咁，唔知主席揀唱《獅子山下》，係咪對時下社會現況有感而發，想憑歌寄意呢？咁就不得而知嚕，不過Ann姐中途嘅一段「爆肚」讀白，就非常有意思喇。佢話：「我哋大家在立法會中相遇上，總算是唏噓多於歡笑。」相信台下嘅議會同事聽到，一定百般滋味在心頭。

盧偉國議員表演唱歌。大公報記者林良堅/攝

　　除咗有主席嘅即興演出，另外仲有四位議員參加「我是歌手」歌唱比賽，一展歌喉，當中盧偉國憑一曲《輪流轉》贏得冠軍，真係做歌手同做樂手都咁掂！當Dr.Lo唱到「今朝少年人，他朝老年人」果陣，佢先向台下攤手，然後指住自己，非常有台型。佢話四年過去，有人會選擇連任，有人會離開議會，所以想送呢首歌俾所有議會同事。

　　除此之外，同樂日仲搞咗個「立法會之最」嘅投票活動，結果經常慷慨激昂咁發言嘅工聯會王國興當選最有「中氣」議員；曾主席就當選最有「人氣」議員。